Upplýsingar um gildandi reglur um ferðatakmarkanir til Íslands verða héðan í frá aðgengilegar á vef landamærasviðs ríkislögreglustjóra - Um ferðatakmarkanir til Íslands vegna COVID-19

Athugið að íslensk stjórnvöld veita ekki fyrirfram heimild fyrir komu til landsins og þurfa farþegar því að hafa öll nauðsynleg gögn meðferðis, sem staðfesta undanþágu frá ferðatakmörkunum, við komu til landsins. Ákvörðun um hvort útlendingi er veitt innganga í landið er tekin af landamæravörðum við komu.

Ítarlegar upplýsingar um hverjir eru undanþegnir ferðatakmörkunum og hvaða gögnum þarf að framvísa við komuna til landsins er að finna á upplýsingasíðunni.

Erlendum ríkisborgurum, sem voru í löglegri dvöl hér á landi fyrir 20. mars síðastliðinn og hafa ekki komist til síns heima vegna ferðatakmarkana, sóttkvíar eða einangrunar, var heimilað að dvelja á Íslandi án dvalarleyfis eða vegabréfsáritunar til og með 10. nóvember 2020 að lokinni skráningu hjá Útlendingastofnun.

Þessi heimild til dvalar án dvalarleyfis eða áritunar verður ekki framlengd á ný og getur slík dvöl fram yfir 10. nóvember leitt til brottvísunar.

Þrátt fyrir að nú sé mögulegt að ferðast til flestra landa heims er ljóst að það gæti reynst erfitt að snúa aftur til sumra landa. Erlendir ríkisborgarar, sem eiga í erfiðleikum með að yfirgefa Ísland fyrir 10. nóvember 2020, þurfa að halda til haga gögnum og upplýsingum um samskipti sem sýna að þeir hafi reynt að snúa aftur heim, ef ske kynni að Útlendingastofnun skyldi óska eftir skýringum á því hvers vegna viðkomandi hafi ekki farið. Ef þú getur ekki orðið þér út um flugmiða til að komast heim, ættirðu að hafa samband við sendiráð heimalands þíns og kanna hvort yfirvöld skipuleggi ferðir til að aðstoða íbúa að snúa heim.

Þann 31. janúar 2020 yfirgaf Bretland ESB á grundvelli útgöngusamnings við sambandið. Samkvæmt skilmálum samningsins tók í kjölfarið við aðlögunartímabil.

Aðlögunartímabilið á að vara til 31. desember 2020 en það verður hugsanlega framlengt ef ESB og Bretland ná um það samkomulagi. Á aðlögunartímabilinu verður farið með Bretland eins og það sé enn aðili að ESB og EES. Reglurnar um frjálsa för munu áfram gilda og réttur breskra ríkisborgara og fjölskyldumeðlima þeirra á Íslandi verður óbreyttur á þessu tímabili.

Ísland og hin EES/EFTA ríkin hafa undirritað samning við Bretland um fyrirkomulag milli ríkjanna í kjölfar útgöngunnar og úrsagnar Bretlands úr EES-samningnum. Samningurinn tryggir réttindi breskra ríkisborgara og fjölskyldumeðlima þeirra á Íslandi og réttindi EES/ FTA ríkisborgara sem búa í Bretlandi. Aðskilnaðarsamningurinn endurspeglar að mestu útgöngusamninginn sem gerður var milli ESB og Bretlands. Markmið aðskilnaðarsamningsins er að tryggja að breskir ríkisborgarar sem búa í EES/EFTA-ríki í lok aðlögunartímabilsins geti haldið því áfram og muni áfram njóta í meginatriðum sömu réttinda og nú.

Útlendingastofnun hefur sett í loftið upplýsingasíðu fyrir breska ríkisborgara (á ensku) með spurningum og svörum um hvernig Brexit mun hafa áhrif á breska ríkisborgara sem búa á Íslandi. Enn er unnið að útfærslu reglna um komu og dvöl á Íslandi fyrir breska ríkisborgara og aðstandendur þeirra og verður síðan því uppfærð reglulega.

Stjórnvöld í Bretlandi hafa einnig birt leiðbeiningar um búsetu á Íslandi.

Umsækjendur sem þurfa að mæta í myndatöku fyrir dvalarleyfiskort geta nú sjálfir bókað tíma á netinu.

Nauðsynlegt er að gefa upp símanúmer ásamt nafni og fæðingardegi eða kennitölu við bókun. Þurfi fleiri en einn í fjölskyldu að koma í myndatöku þarf að bóka tíma fyrir hvern og einn.

Við vonum að þessi nýja þjónusta mælist vel fyrir.