Erlendur ríkisborgari eða ríkisfangslaus einstaklingur á aldrinum 18 – 21 árs getur lagt fram tilkynningu um íslenskan ríkisborgararétt í ákveðnum tilvikum.
Eftirfarandi skilyrði gilda:
- Umsækjandi skal leggja fram tilkynningu eftir að hann hefur náð 18 ára aldri en áður en hann hefur náð 21 árs aldri og;
- skal hafa átt lögheimili og haft samfellda löglega dvöl hér á landi frá því hann náði 13 ára aldri.
Afgreiðslugjald
Það athugist að umsókn er ekki tekin til vinnslu fyrr en greiðsla hefur borist. Upplýsingar um afgreiðslugjald og bankaupplýsingar má finna hér.
Nauðsynleg fylgigögn umsóknar
Upplýsingar um ‚apostille‘ vottun og tvöfalda staðfestingu, löggilta þýðingu og staðfest afrit má finna hér. Það athugist að ekki þarf vottun á íslensk vottorð.
- Umsókn um íslenskan ríkisborgararétt fyrir 18 ára og eldri.
- Afrit erlends vegabréfs umsækjanda og íslensks vegabréfs ef til er.
- Staðfest afrit af frumriti fæðingarvottorðs. Frumritið skal vera vottað með ‚apostille‘ vottun eða tvöfaldri staðfestingu, og síðan tekið af því staðfest afrit.
- Staðfest afrit eða frumrit þýðingar löggilts skjalaþýðanda á fæðingarvottorði. Þetta á við ef erlend vottorð eru á öðru tungumáli en ensku eða Norðurlandamáli.
- Búsetutímavottorð frá Þjóðskrá. Vottorðið tilgreinir í hvaða landi eða löndum umsækjandi hefur átt lögheimili frá upphafi lögheimilisskráningar á Íslandi til dagsins í dag.