Almennt er umsækjanda skylt að mæta í eigin persónu til að sækja um vegabréfsáritun í viðkomandi sendiráði/ræðisskrifstofu eða þjónustuskrifstofu.
Umsækjandi þarf að leggja fram eftirfarandi gögn:
- Umsóknareyðublað, vel fyllt út og undirritað af umsækjanda. Athugið að nauðsynlegt er að hlaða eyðublöðum niður af vefnum og vista á tölvu áður en þau eru fyllt út. Ef umsækjandi er barn, þurfa foreldrar að undirrita eyðublaðið.
- Passamynd af umsækjanda (35x45 mm).
- Vegabréf. Vegabréfið verður að gilda minnst 3 mánuði fram yfir áætlaða dvöl. Það verða að vera að minnsta kosti 2 auðar blaðsíður í vegabréfinu og það má ekki vera eldra en 10 ára.
- Staðfesting á framfærslu. Annaðhvort þarf að leggja fram bankayfirlit umsækjanda eða ábyrgðaryfirlýsingu frá gestgjafa “Ábyrgðaryfirlýsing vegna heimsóknar“ ásamt bankayfirliti eða launaseðlum gestgjafa.
- Gögn sem sýna tengsl umsækjanda við heimaland, t.d. yfirlýsing vinnuveitanda um atvinnuþátttöku umsækjanda eða staðfesting skóla á skólavist hans.
- Sjúkratrygging. Ferðamannatrygging að lágmarki 30,000 evrur.
- Gögn sem staðfesta tilgang ferðar:
- Boðsbréf frá gestgjafa á Íslandi, ef um heimsókn til vina eða ættingja er að ræða. Ef ætlunin er að heimsækja ættingja, fæðingarvottorð til staðfestingar á skyldleika.
- Staðfesting frá fyrirtæki á Íslandi, ef um viðskiptaferð er að ræða.
- Hótelbókun/ferðabókun, ef viðkomandi er ferðamaður.
- Staðfesting frá viðkomandi stofnun, ef ætlunin er að sækja námskeið eða fund.
Þegar umsókn er lögð inn skal umsækjandi heimila að fingraför hans séu tekin og greiða gjald fyrir umsóknina.
Athugið að þetta eru aðeins grunnskjalakröfur. Þar sem ferlið getur verið mismunandi eftir því hvar sótt er um er umsækjanda bent á að skoða vel heimasíðu viðkomandi sendiráðs, en þar eru ítarlegar leiðbeiningar um umsóknarferlið.