Útlendingastofnun fær fjölmargar fyrirspurnir frá umsækjendum og umboðsmönnum þeirra í tengslum við endurnýjun dvalarleyfis og hvort umsækjanda sé óhætt að ferðast á meðan beðið er endurnýjunar dvalarleyfis.

Þeir sem ferðast erlendis án gilds dvalarleyfiskorts geta lent í erfiðleikum við landamæraeftirlit. Dvalarleyfiskort er eina gilda skírteinið sem sannar að viðkomandi hafi dvalarleyfi á Íslandi. Útlendingastofnun getur ekki gefið út annars konar skjal sem tryggir að viðkomandi geti ferðast án hindrana á meðan umsókn um endurnýjun dvalarleyfis er til vinnslu hjá stofnuninni.

Svokallað "to whom it may concern" bréf, sem staðfestir að lögð hafi verið fram umsókn hjá stofnuninni, tryggir ekki að umsækjandi geti ferðast erlendis án vandkvæða. Útlendingastofnun mælir því með að umsókn um endurnýjun sé lögð fram með góðum fyrirvara. Einnig er mælt með að beðið sé með ferðalög þar til endurnýjun dvalarleyfis hefur verið veitt og umsækjandi hefur fengið nýtt dvalarleyfiskort í hendurnar. Gildistíma dvalarleyfis er að finna á dvalarleyfiskorti.

Ferðalög erlendis og flýtimeðferð

Stofnunin fær jafnframt fjölmargar fyrirspurnir frá þeim sem vilja kanna hvort stofnunin geti flýtt afgreiðslu umsókna vegna ferðalaga erlendis. Útlendingastofnun afgreiðir umsóknir í þeirri röð sem þær berast og eru því elstu umsóknirnar afgreiddar fyrst. Flýtimeðferð er aðeins veitt í undantekningartilfellum. Til að umsókn sé tekin til afgreiðslu á undan öðrum sem hafa beðið lengur þurfa óviðráðanlegar ytri aðstæður að vera fyrir hendi. Ferðalög erlendis geta ekki verið grundvöllur flýtimeðferðar umsóknar.

Vegna umfjöllunar í fjölmiðlum undanfarið, um einstaklinga sem fluttir hafa verið úr landi á grundvelli Dyflinnarreglugerðarinnar meira en tólf mánuðum eftir að umsókn var lögð fram, vill Útlendingastofnun koma eftirfarandi á framfæri.

Í 2. mgr. 36. gr. laga um útlendinga segir að ef meira en tólf mánuðir hafa liðið frá því að umsókn um alþjóðlega vernd barst fyrst íslenskum stjórnvöldum og tafir á afgreiðslu hennar eru ekki á ábyrgð umsækjanda sjálfs skuli taka hana til efnismeðferðar.

Ljóst er að leggja þarf mat á það í hverju tilviki fyrir sig hvort tafir á afgreiðslu umsóknar séu á ábyrgð umsækjanda og er það gert af því stjórnvaldi sem hefur málið til meðferðar á þeim tímapunkti þegar tólf mánuðirnir eru liðnir.

Ef Útlendingastofnun hefur þegar tekið ákvörðun í máli og kærunefnd útlendingamála staðfest hana innan tímamarka en ákvörðunin hins vegar ekki verið framkvæmd með flutningi úr landi innan tólf mánaða, getur umsækjandi óskað eftir því við kærunefnd útlendingamála að málið verði endurupptekið á þeim grundvelli og fyrri ákvörðun felld úr gildi.

Beiðni um endurupptöku máls frestar þó ekki réttaráhrifum þeirrar niðurstöðu sem þegar liggur fyrir. Kemur það því ekki í veg fyrir framkvæmd fyrirhugaðs flutnings úr landi að lögð sé fram beiðni um endurupptöku. Kærunefndinni er heimilt að fresta framkvæmd á flutningi telji hún að verulega breyttar aðstæður hafi skapast frá því að endanleg ákvörðun var tekin en sjái nefndin ekki tilefni til frestunar ber að framkvæma flutninginn í samræmi við niðurstöðu máls.

Flutningur viðkomandi úr landi kemur að sjálfsögðu ekki í veg fyrir afgreiðslu kærunefndar á beiðni um endurupptöku.

Útlendingastofnun leggur mikla áherslu á að afgreiða umsóknir um dvalarleyfi eins hratt og unnt er í þágu umsækjenda og er markmið stofnunarinnar að afgreiðsla umsóknar taki ekki lengri tíma en 90 daga frá því að fullnægjandi gögn hafa borist.

Miklar annir eru nú hjá aðstandendateymi leyfasviðs en um 200 umsóknir um fyrsta dvalarleyfi vegna fjölskyldusameiningar og um 190 umsóknir um endurnýjun fjölskyldusameiningarleyfa bíða afgreiðslu. Elstu óafgreiddu umsóknirnar eru frá síðari hluta desembermánaðar.

Næstu tvær vikurnar verður allt kapp lagt á afgreiðslu þessara umsókna með það að leiðarljósi að stytta biðtíma umsækjenda. Óhjákvæmilegt er hins vegar að slíkt átak verði á kostnað persónulegrar þjónustu við umsækjendur um fjölskyldusameiningarleyfi á tímabilinu frá 16. til 26. apríl. Leyfafulltrúar teymisins munu ekki hafa viðveru á símatíma og tölvupóstum verður ekki svarað daglega.

Umsóknirnar verða unnar eins hratt og mögulegt er og mun fyrirspurn í síma, tölvupósti eða afgreiðslu ekki flýta fyrir vinnslu umsóknar. Ef stofnunina vantar frekari gögn eða upplýsingar vegna umsóknar verður haft samband við umsækjanda eða umboðsmann.

Minnt er á að almennum fyrirspurnum er svarað alla virka daga á opnunartíma skiptiborðs.

Upplýsingar um hvaða umsóknir hafa verið teknar til vinnslu má finna hér.