Afgreiðsla umsókna um atvinnuleyfi hjá Vinnumálastofnun er nú aftur með hefðbundnum hætti en stofnunin þurfti áður að fresta afgreiðslu umsókna og afnema flýtimeðferð tímabundið vegna álags í tengslum við afleiðingar Covid-19 faraldursins (sjá eldri frétt).

Þetta þýðir að Útlendingastofnun getur á ný tekið umsóknir um dvalarleyfi á grundvelli atvinnuþátttöku til flýtimeðferðar frá og með 2. júní 2020.

Útlendingar sem staddir eru hér á landi og komast ekki til síns heima vegna ferðatakmarkana, sóttkvíar eða einangrunar mega dvelja hér á landi án dvalarleyfis eða vegabréfsáritunar til og með 10. ágúst 2020, samkvæmt nýju bráðabirgðaákvæði við reglugerð um útlendinga sem hefur þegar tekið gildi.

Um er að ræða framlengingu um mánuð á heimild sem bætt var við reglugerð um útlendinga með bráðabirgðaákvæði í byrjun apríl.

Um hverja gildir bráðabirgðaákvæðið?

Ákvæðið gildir um útlendinga sem dvöldu hér á landi fyrir innleiðingu ferðatakmarkana þann 20. mars 2020 á grundvelli:

• dvalarleyfis, sem nú er útrunnið eða rennur út áður en viðkomandi getur yfirgefið landið,
• áritunar, sem nú er útrunnin eða rennur út áður en viðkomandi getur yfirgefið landið,
• áritunarfrelsis, en mun hafa dvalið lengur en 90 daga á Schengen svæðinu áður en viðkomandi getur yfirgefið landið.
  
  

Um hverja gildir bráðabirgðaákvæðið ekki?

Ákvæðið gildir ekki um útlendinga sem voru í ólögmætri dvöl fyrir 20. mars 2020 og kemur ekki í veg fyrir frávísun eða brottvísun á þeim grundvelli eða öðrum grundvelli samkvæmt ákvæðum útlendingalaga.

Þarf ég að óska eftir heimild til að dvelja lengur á landinu?

Nei, ekki þarf að óska eftir heimild til að dvelja lengur á landinu. Reglugerðarbreytingin veitir öllum þeim sem hún nær til sjálfkrafa heimild til að dvelja lengur á landinu án dvalarleyfis eða vegabréfsáritunar.

Hvað má ég dvelja lengi á landinu?

Útlendingar í þessari stöðu eru beðnir um að yfirgefa landið eins fljótt og hægt er, í síðasta lagi 10. ágúst 2020.

Dómsmálaráðherra hefur ákveðið að ferðatakmarkanir sem tóku gildi þann 20. mars sl. verði framlengdar til 15. júní 2020, í samræmi við tilmæli framkvæmdastjórnar ESB til aðildarríkja Schengen samstarfsins. 

Umfang ferðatakmarkananna er óbreytt og er útlendingum, sem hvorki eru EES- né EFTA-borgarar, áfram óheimilt að koma til landsins nema þeir geti sýnt fram á að för þeirra sé vegna brýnna erinda.

Nánari upplýsingar um til hverra ferðatakmarkanirnar ná og hverjir eru undanþegnir þeim er að finna í fyrri frétt á heimasíðu Útlendingstofnunar.

Einstaklingum sem koma til Íslands frá löndum sem skilgreind eru af sóttvarnalækni sem svæði með mikla smitáhættu, er áfram skylt að fara í sóttkví í 14 daga frá komu til landsins, en heimild sóttvarnalæknis til að veita undanþágur fyrir vinnusóttkví hefur verið rýmkuð. Tímabundið landamæraeftirlit á innri landamærum hefur þar af leiðandi verið framlengt.

Samkvæmt tilkynningu stjórnvalda er stefnt að því að eigi síðar en 15. júní næstkomandi taki gildi reglur um sýnatökur sem fela í sér að þeir sem koma til landsins geta komist hjá sóttkví að uppfylltum tilteknum skilyrðum. Er þá annað hvort um að ræða að viðkomandi láti prófa sig við COVID-19 á Keflavíkurflugvelli við komuna til landsins, eða geti framvísað fullnægjandi vottorði um að sýnataka erlendis hafi leitt í ljós að viðkomandi sé ekki smitaður af kórónaveirunni.

Útlendingastofnun mun nú sem fyrr leggja sig fram um að afgreiða allar umsóknir um dvalarleyfi fyrir námsmenn áður en kennsla á haustönn hefst. Í ljósi óvissuástands vegna COVID-19 hefur frestur til að sækja um námsmannaleyfi verið lengdur um mánuð.

Skilyrði fyrir því að stofnunin geti ábyrgist að umsókn verði afgreidd í tæka tíð er að hún berist fyrir 1. júlí og að henni fylgi öll nauðsynleg fylgigögn á réttu formi.

Umsóknir sem berast eftir umsóknarfrest er ekki hægt að tryggja að verði afgreiddar áður en skólahald hefst, jafnvel þótt öll gögn séu fullnægjandi.

Hvað getur þú gert til að flýta fyrir afgreiðslu umsóknar?

• Gættu þess að láta öll nauðsynleg fylgigögn fylgja með umsókn. Lista yfir þau gögn sem þurfa að fylgja er að finna hér.

• Gættu þess að fylgigögnin uppfylli gagnakröfur stofnunarinnar.

Einkum þarftu að gæta þess að sakavottorðið sem þú leggur fram hafi verið gefið út af æðsta yfirvaldi sem heimilt er að gefa út slíkt vottorð í viðkomandi landi. Vottorðið þarf að sýna að leitað hafi verið í gagnagrunnum alls landsins en ekki einungis á ákveðnum svæðum (t.d. ríkjum eða fylkjum). Fyrir nema frá Bandaríkjunum þýðir þetta að þeir þurfa að skila inn FBI sakavottorði, Kanadabúar þurfa að skila inn RCMP vottorði og nemar frá Taílandi þurfa að skila inn vottorði sem gefið er út af Royal Thai Police.

• Gættu þess að þú uppfyllir skilyrði um trygga sjálfstæða framfærslu og að þú sýnir fram á trygga framfærslu þína með fullnægjandi hætti.