Útlendingastofnun vill koma því á framfæri að grísk stjórnvöld hafa ekki hafnað því að taka við einstaklingum sem hafa fengið alþjóðleg vernd í Grikklandi.

Stoðdeild ríkislögreglustjóra undirbýr nú ferð til Grikklands með fjölskyldu og einstakling, sem var synjað um efnislega meðferð umsókna þeirra um alþjóðlega vernd hér á landi vegna þess að þau njóta nú þegar alþjóðlegrar verndar í Grikklandi.

Ferðin var á áætlun í þessari viku en hlutaðeigandi hefur verið tilkynnt að hún muni frestast. Samkvæmt upplýsingum frá stoðdeild er ástæðan sú að boðleiðum fyrir endursendingarbeiðnir í grísku stjórnsýslunni hefur verið breytt og því liggur ekki fyrir samþykki frá réttu stjórnvaldi. Endursendingarbeiðni hefur nú þegar verið send þar til bæru stjórnvaldi til afgreiðslu.

Það er því ekki rétt að grísk stjórnvöld hafi hafnað því að taka aftur við einstaklingum sem hafa fengið alþjóðleg vernd í Grikklandi vegna aðstæðna þar í landi.

Skráning í íslenskupróf fyrir umsækjendur um íslenskan ríkisborgararétt hefst 10. mars á www.mimir.is.

Próf að vori verða sem hér segir:

• Akureyri, þriðjudaginn 19. maí 2020 kl. 13.00
• Egilsstaðir*, miðvikudaginn 20. maí 2020 kl. 13.00
• Ísafjörður*, föstudaginn 22. maí 2020 kl. 13.00
• Reykjavík, mánudaginn 25. til föstudaginn 29. maí 2020 kl. 9.00 og kl. 13.00

*Athugið að próf á Egilsstöðum og Ísafirði eru eingöngu haldin á vorin.

Síðasti skráningardagur er 4. maí 2020.

Af ófyrirsjáanlegum orsökum mun innleiðing nýrrar tegundar dvalarleyfiskorta tefjast.

Útlendingastofnun þarf þess vegna að takmarka útgáfu dvalarleyfiskorta enn frekar en þegar hafði verið tilkynnt.

Aðeins verða gefin út dvalarleyfiskort til einstaklinga sem geta sýnt fram á að þeir þurfi á þeim að halda vegna ferðalaga erlendis. Leggja þarf fram gild ferðagögn s.s. flugmiða til staðfestingar.

Í stað dvalarleyfiskorta munu umsækjendur fá send bréf frá Útlendingastofnun til staðfestingar á útgáfu dvalarleyfis, með upplýsingum um gildistíma og atvinnuréttindi.

Útlendingastofnun biðst innilegrar velvirðingar á þeim óþægindum sem þetta veldur og bendir þeim sem hafa frekari spurningar á að hafa samband við stofnunina gegnum This email address is being protected from spambots. You need JavaScript enabled to view it..

Útlendingastofnun vill koma því á framfæri að við málsmeðferð umsókna barna um alþjóðlega vernd eru tekin viðtöl við öll börn sem hafa til þess aldur og þroska að fengnu samþykki foreldra.

Fram kom í fjölmiðlum um helgina að til stæði að fylgja íranskri fjölskyldu, sem hefur dvalið á Íslandi frá því í mars á liðnu ári, til Portúgal en framkvæmdinni var frestað af heilbrigðisástæðum.

Fjölskyldan kom hingað til lands og sótti um alþjóðlega vernd eftir stutta dvöl í Portúgal. Portúgölsk yfirvöld höfðu veitt fjölskyldunni vegabréfsáritun inn á Schengen-svæðið og var umsókn hennar um vernd því afgreidd á grundvelli Dyflinnarreglugerðarinnar með ákvörðun um að þeim skyldi fylgt aftur til Portúgal. Þar í landi stendur fjölskyldunni til boða nauðsynleg þjónusta og málsmeðferðarúrræði fyrir umsækjendur um alþjóðlega vernd.

Viðtöl við börn

Við málsmeðferð umsókna barna um alþjóðlega vernd tekur starfsfólk Útlendingastofnunar viðtöl við öll börn sem hafa til þess aldur og þroska að fengnu samþykki foreldra. Starfsfólk stofnunarinnar, sem hefur hlotið til þess sérstaka þjálfun, hefur tekið viðtöl við börn allt niður í fimm ára aldur. Þannig er börnum tryggður réttur til að tjá sig sjálf um aðstæður sínar, heilsufar, líðan og fleira. Tillit er tekið til skoðana barna í samræmi við aldur þeirra og þroska. Foreldrar geta afþakkað boð stofnunarinnar um að viðtal sé tekið við barn og er framburður foreldranna um aðstæður barnsins lagður til grundvallar ákvörðunum stofnunarinnar í slíkum tilvikum.

Þessu verklagi var fylgt við afgreiðslu umsóknar fjölskyldunnar frá Íran.

Bakgrunnur – Dyflinnarsamstarfið

Sem þátttakandi í Schengen-samstarfinu hefur Ísland innleitt svokallaða Dyflinnarreglugerð en í henni eru sett fram viðmið sem ákvarða hvaða ríki samstarfsins ber ábyrgð á meðferð umsóknar um alþjóðlega vernd. Eitt þessara viðmiða kveður á um að það ríki sem veitir einstaklingi áritun inn á Schengen-svæðið skuli bera ábyrgð á meðferð umsóknar um alþjóðlega vernd ef viðkomandi nýtir áritunina til að sækja um vernd í einhverju ríki samstarfsins.

Rétt er að taka fram að þegar umsókn um alþjóðlega vernd er afgreidd á grundvelli Dyflinnarreglugerðarinnar er ekki tekin afstaða til þess hvort viðkomandi eigi rétt á alþjóðlegri vernd heldur er ákveðið að viðkomandi skuli fylgt til þess ríkis sem ber ábyrgð á meðferð umsóknarinnar. Það er hlutverk ríkisins sem ber ábyrgð á meðferð umsóknarinnar að skera úr um það hvort viðkomandi eigi rétt á alþjóðlegri vernd.