Útlendingastofnun þarf á ný að takmarka útgáfu dvalarleyfiskorta vegna lágrar birgðastöðu.

Aðeins verða gefin út dvalarleyfiskort til einstaklinga sem geta sýnt fram á að þeir þurfi á þeim að halda vegna ferðalaga erlendis. Senda þarf gild ferðagögn, s.s. flugmiða, á This email address is being protected from spambots. You need JavaScript enabled to view it. til staðfestingar.

Í stað dvalarleyfiskorta munu umsækjendur fá bréf frá Útlendingastofnun til staðfestingar á útgáfu dvalarleyfis, með upplýsingum um gildistíma og atvinnuréttindi.

Útlendingastofnun biðst innilegrar velvirðingar á þeim óþægindum sem þetta kann að valda. 

Aðlögunartímabili vegna útgöngu Bretlands úr Evrópusambandinu lýkur 31. desember 2020.

Ferðatakmarkanir

Frá og með 1. janúar 2021 munu breskir ríkisborgarar ekki lengur njóta frjálsrar farar sem EES/EFTA-borgarar.

Þetta þýðir að frá áramótum munu breskir ríkisborgarar, sem ekki hafa fasta búsetu á Íslandi, falla undir ferðatakmarkanir til Íslands vegna Covid-19 líkt og aðrir ríkisborgarar þriðju ríkja.

Breskir ríkisborgarar með fasta búsetu á Íslandi munu ekki falla undir ferðatakmarkanirnar.

Ítarlegar upplýsingar um gildandi ferðatakmarkanir, undanþágur frá þeim og þau gögn sem undanþegnir einstaklingar þurfa að framvísa á landamærum, er að finna á upplýsingasíðu landamærasviðs ríkislögreglustjóra.

Staðfesting á búsetu á Íslandi

Útlendingastofnun mun á næstu mánuðum hefja útgáfu dvalarleyfiskorta fyrir breska ríkisborgara, sem höfðu skráð rétt sinn til búsetu á Íslandi fyrir lok aðlögunartímabilsins. Ekki er mögulegt að sækja um slík kort enn þá. Tilkynnt verður um það á þessari síðu um leið og hægt verður að sækja um þessi dvalarleyfiskort.

Þangað til geta breskir ríkisborgarar sýnt fram á rétt sinn til búsetu á Íslandi með búsetutímavottorði (C-122) sem gefið er út af Þjóðskrá Íslands.

Breskum ríkisborgurum sem hafa skráð rétt sinn til búsetu hér á landi er ráðlagt að hafa búsetutímavottorð meðferðis þegar þeir ferðast erlendis til að geta sýnt fram á rétt sinn til búsetu á Íslandi við heimkomu.

Frekari upplýsingar er að finna á upplýsingasíðu fyrir breska ríkisborgara (á ensku).

Breytingar hafa verið gerðar á verklagi við afgreiðslu umsókna um dvalarleyfi. Héðan í frá verður heimilt að leggja fram afrit af sakavottorði og þarf afritið hvorki að vera vottað með apostille vottun né keðjustimplun. Vottorðið þarf að ná yfir síðustu 5 ár fyrir framlagningu umsóknar og má ekki vera eldra en 12 mánaða þegar það er lagt fram.

Athugið að í einstökum tilvikum gæti Útlendingastofnun þó þurft að óska eftir vottuðu frumriti sakavottorðs.

Verið er að vinna í því að uppfæra heimasíðuna í samræmi við þessa breytingu.

Umsækjendur um alþjóðlega vernd dvelja í þremur búsetuúrræðum á vegum Útlendingastofnunar, að Lindarbraut á Ásbrú, Grensásvegi í Reykjavík og Bæjarhrauni í Hafnarfirði. Meirihluti umsækjenda um vernd dvelur hins vegar í úrræðum á vegum þriggja sveitarfélaga, Hafnarfjarðar, Reykjanesbæjar og Reykjavíkurborgar, á grundvelli þjónustusamninga við Útlendingastofnun.

Engar athugasemdir í úttekt á sóttvörnum í húsnæði á vegum Útlendingastofnunar

Frá upphafi covid-19 faraldursins hefur Útlendingastofnun lagt á það ríka áherslu að tryggja að einstaklingar sem dvelja í húsnæði á vegum stofnunarinnar geti sem best sinnt einstaklingsbundnum smitvörnum. Þetta er fyrst og fremst gert með upplýsingum til íbúa um hvernig komið er í veg fyrir smit og með því að tryggja aðgengi að sápu, sótthreinsiefnum og grímum. Þá var sameiginleg eldunaraðstaða tekin úr notkun þar sem hún var til staðar og matarbakkar pantaðir í staðinn til að draga úr samgangi manna á milli. Enn sem komið er hefur ekkert smit komið upp í búsetuúrræði á vegum Útlendingastofnunar.

Þann 5. nóvember sl. gerði hjúkrunarfræðingur á vegum Heilsuverndar úttekt á sóttvörnum í húsnæði Útlendingastofnunar að Lindarbraut á Ásbrú sem skoða má hér. Þar kemur meðal annars fram að aðgengi að vöskum, sápu og handspritti sé mjög gott, loftræsting sé góð og gott aðgengi fyrir íbúa til að sótthreinsa snertifleti.

Spritt er við alla innganga, nema í Bæjarhrauni þar sem það er við inngang á hverja hæð fyrir sig, á öllum sameiginlegum salernum og víðsvegar á herbergjagöngum í Bæjarhrauni og Lindarbraut. Ruslatunnur í sameiginlegum rýmum eru snertilausar. Við þetta má bæta að allir sem koma nýir inn í úrræði fá lítinn sprittbrúsa og handsápu afhent með startpakka og geta nálgast meira eftir þörfum. Andlitsgrímur eru einnig aðgengilegar hjá öryggisvörðum eftir þörfum.

Eins og annars staðar í samfélaginu taka þær sóttvarnaráðstafanir sem gripið er til í úrræðunum hverju sinni mið af stöðu faraldursins og leiðbeiningum heilbrigðisyfirvalda og eru því í sífelldri endurskoðun.

Sóttvarnir í úrræðum á vegum Hafnarfjarðarbæjar

Um 60 umsækjendur um alþjóðlega vernd dvelja í þjónustu Hafnarfjarðarbæjar á grundvelli samnings við Útlendingastofnun. Fyrst og fremst er um að ræða fjölskyldur sem dvelja hver fyrir sig í íbúðum, með eigin eldunar- og salernisaðstöðu, í tveimur fjölbýlishúsum í Hafnarfirði. Í byrjun vikunnar greindist covid-19 smit hjá einum þessara einstaklinga og hefur smitrakningarteymi almannavarna unnið að rakningu smitsins og tekið ákvarðanir um sóttkví og skimanir út frá því, eins og í öðrum slíkum tilvikum. Fleiri einstaklingar greindust smitaðir í gær og voru þeir allir í sóttkví. Íbúar í nokkrum íbúðum eru áfram í sóttkví. Allir einstaklingar sem greindust smitaðir þáðu boð um að vera fluttir í sóttvarnahús en þeir sem eru í sóttkví njóta aðstoðar og þjónustu Hafnarfjarðarbæjar.

Hafnarfjarðarbær hefur undanfarnar vikur verið með daglega viðveru á staðnum á virkum dögum þar sem íbúar hafa meðal annars verið upplýstir um stöðu covid-19 faraldursins á Íslandi og fengið leiðbeiningar um mikilvægi einstaklingsbundinna sóttvarna. Handspritti og grímum var dreift til allra íbúa og hafa þeir geta nálgast viðbótar spritt og grímur í þjónustuviðtölum. Aðstæður til einstaklingsbundinna sóttvarna eru með besta móti í húsnæðinu því eins og áður sagði er um að ræða fjölskyldur sem dvelja í íbúðum með eigin eldhús og baðherbergi. Þrátt fyrir það hafa smit náð að berast á milli einstaklinga enda samgangur á milli fjölskyldna eins og eðlilegt er.