Útlendingastofnun hefur bætt Moldóvu á lista stofnunarinnar yfir örugg upprunaríki.
Moldóva er aðili að öllum helstu alþjóðasamningum um vernd mannréttinda, m.a. Genfarsáttmálanum, Mannréttindasáttmála Evrópu, alþjóðasamningi um borgaraleg og stjórnmálaleg réttindi sem og samningi Sameinuðu þjóðanna gegn pyndingum og annarri grimmilegri, ómannlegri eða vanvirðandi meðferð eða refsingu. Mannréttindi eru almennt virt í Moldóvu og ekki eru stundaðar kerfisbundnar ofsóknir gegn fólki. Útlendingastofnun hefur kannað aðstæður í Moldóvu og fyrir liggur að allar forsendur eru fyrir hendi til að skilgreina landið sem öruggt upprunaríki.
Rétt er að árétta að það eitt að umsækjandi um vernd sé frá ríki á listanum yfir örugg upprunaríki leiðir ekki til þess að Útlendingastofnun taki mál hans ekki til skoðunar eða synji umsókn hans án undangenginnar rannsóknar. Þegar það á við eru mál ríkisborgara landa á listanum tekin til almennrar efnismeðferðar og er listinn því aðeins til hliðsjónar.
Nánari upplýsingar um ástæður þess að Moldóva hefur verið sett á lista yfir örugg upprunaríki er að finna hér.