Upplýsingarnar hér að neðan hafa verið uppfærðar í samræmi við reglugerð um breytingu á reglugerð um för yfir landamæri frá 10. ágúst sl.
Dómsmálaráðherra hefur ákveðið að framlengja ferðatakmarkanir ESB og Schengen ótímabundið en afnema jafnframt takmarkanir gagnvart íbúum tiltekinna ríkja í samræmi við lista aðildarríkja ESB.
Erlendum ríkisborgurum öðrum en þeim sem taldir eru upp hér að neðan er áfram óheimilt að koma til Íslands nema þeir geti sýnt fram á að för þeirra sé vegna brýnna erinda.
Til hverra ná ferðatakmarkanirnar ekki?
Ferðatakmarkanir gilda ekki um:
- Ríkisborgara aðildarríkja EES og EFTA (þ.m.t. Bretland) sem og ríkisborgara Andorra, Mónakó, San Marínó og Vatíkansins.
- Erlenda ríkisborgara með gilt dvalarleyfi eða annars konar dvalar- eða búseturétt á Íslandi eða í öðru EES/EFTA ríki (þ.m.t. Bretlandi), Andorra, Mónakó, San Marínó eða Vatíkaninu.
- Aðstandendur Íslendinga, EES/EFTA-borgara (þ.m.t. breskir ríkisborgarar), ríkisborgara Andorra, Mónakó, San Marínó eða Vatíkansins sem og aðstandendur dvalarleyfishafa á Íslandi eða í öðru EES/EFTA ríki (þ.m.t. Bretlandi), Andorra, Mónakó, San Marínó eða Vatíkaninu. Með aðstandendum er átt við maka, sambúðarmaka, afkomendur og ættingja í beinan legg.
- Erlenda ríkisborgara sem eru í nánu parasambandi, sem staðið hefur um lengri tíma, með einstaklingi sem er löglega búsettur hér á landi. Athugið að ákvæðið nær ekki til aðila sem eru í nánu parasambandi við íslenska ríkisborgara sem búsettir eru erlendis.
- Erlenda ríkisborgara sem hafa sannanlega búsetu í og eru að koma til landsins frá einu af eftirtöldum ríkjum:
Ástralíu, Georgíu, Japan, Kanada, Nýja Sjálandi, Rúanda, Suður Kóreu, Tælandi, Túnis og Úrúgvæ.
Vinsamlegast athugið að áritunarskyldir einstaklingar þurfa eftir sem áður að fá útgefna vegabréfsáritun til að mega ferðast til Íslands. Reglur um vegabréfsáritanir geta því takmarkað rétt einstaklinga til að koma til landsins jafnvel þótt ferðatakmarkanirnar nái ekki til þeirra.
|
Hvaða gögnum þarf að framvísa til að mega koma inn í landið? | |
|---|---|
| 1. Ríkisborgarar aðildarríkja EES og EFTA (þ.m.t. Bretland) sem og ríkisborgarar Andorra, Mónakó, San Marínó og Vatíkansins | Gildum ferðaskilríkjum |
|
2. Erlendir ríkisborgarar með gilt dvalarleyfi eða annars konar dvalar- eða búseturétt á Íslandi eða í öðru EES/EFTA ríki (þ.m.t. Bretlandi), Andorra, Mónakó, San Marínó eða Vatíkaninu |
Gildum ferðaskilríkjum og gildu dvalarleyfiskorti |
|
3. Makar Íslendinga, EES/EFTA-borgara (þ.m.t. Bretar), ríkisborgara Andorra, Mónakó, San Marínó eða Vatíkansins sem og makar dvalarleyfishafa á Íslandi eða í öðru EES/EFTA ríki (þ.m.t. Bretlandi), Andorra, Mónakó, San Marínó eða Vatíkaninu |
Gildum ferðaskilríkjum og staðfestu hjónavígsluvottorði* |
|
3. Afkomendur og ættingjar Íslendinga, EES/EFTA-borgara (þ.m.t. Bretar), ríkisborgara Andorra, Mónakó, San Marínó eða Vatíkansins í beinan legg sem og afkomendur og ættingjar dvalarleyfishafa á Íslandi eða í öðru EES/EFTA ríki (þ.m.t. Bretlandi), Andorra, Mónakó, San Marínó eða Vatíkaninu í beinan legg |
Gildum ferðaskilríkjum og staðfestu fæðingarvottorði* sem sýnir fram á tengsl |
|
3. Sambúðarmakar Íslendinga, EES/EFTA-borgara (þ.m.t. Bretar), ríkisborgara Andorra, Mónakó, San Marínó eða Vatíkansins sem og sambúðarmakar dvalarleyfishafa á Íslandi eða í öðru EES/EFTA ríki (þ.m.t. Bretlandi), Andorra, Mónakó, San Marínó eða Vatíkaninu |
Gildum ferðaskilríkjum og staðfestu sambúðarvottorði* |
| 4. Aðilar í nánu parasambandi, sem staðið hefur um lengri tíma, með einstaklingi sem er löglega búsettur hér á landi. | Gildum ferðaskilríkjum og staðfestingu á löglegri búsetu kærasta/kærustu hér á landi (búsetuvottorð frá Þjóðskrá). Athugið að til þess getur komið að staðfestingar á nánu parasambandi sé óskað á landamærum. |
|
5. Erlendir ríkisborgarar sem hafa sannanlega búsetu í og eru að koma til landsins frá einu af eftirtöldum ríkjum: |
Gildum ferðaskilríkjum, gögnum sem staðfesta búsetu í einu þessara ríkja (t.d. dvalarleyfi, atvinnuleyfi, nafnskírteini eða ökuskírteini sem útgefin eru af viðkomandi búseturíki) og gögnum sem staðfesta að farþegi sé að koma til Íslands frá viðkomandi ríki (gögn sem staðfesta ferðaleið). |
* Með staðfestu vottorði er átt við að opinbert stjórnvald sem til þess hefur heimild hafi vottað útgáfu skjalsins. Vottorðum á öðrum tungumálum en ensku eða norðurlandamáli þarf að fylgja þýðing á ensku.
Skilyrðin hér að ofan gilda um alla þá sem koma inn á Schengen svæðið á Íslandi óháð því hvort þeir ætli sér að ferðast héðan áfram til annarra aðildarríkja Schengen samstarfsins.
Frá og með 15. júní eiga ofan taldir einstaklingar þess kost að fara í sýnatöku vegna COVID-19 við komuna til landsins í stað 14 daga sóttkvíar, sjá nánari upplýsingar á covid.is.
Undanþágur vegna brýnna erinda
Erlendir ríkisborgarar aðrir en þeir sem taldir eru upp hér að ofan eru undanþegnir ferðatakmörkununum ef þeir koma til landsins í brýnum erindagjörðum, þ. á m.:
- farþegar í gegnumferð,
- starfsfólk á sviði heilbrigðisþjónustu og öldrunarþjónustu,
- starfsfólk sem sinnir flutningum á vöru og þjónustu,
- einstaklingar sem hafa þörf á alþjóðlegri vernd,
- einstaklingar sem þurfa að ferðast vegna brýnna aðstæðna í fjölskyldu sinni,
- diplómatar, starfsmenn alþjóðastofnana, meðlimir herliðs og starfsmenn sem sinna mannúðaraðstoð,
- námsmenn, athugið að sýna þarf fram á að tilgangur ferðar sé að sækja skipulagt nám/námskeið,
- einstaklingar sem þurfa nauðsynlega að ferðast vegna starfa sem teljast efnahagslega mikilvæg og störf þeirra geta ekki verið framkvæmd síðar eða erlendis.
Athugið að ekki eru veittar undanþágur fyrir ferðamennsku af neinu tagi.
Vinsamlegast athugið að námsmönnum sem eru skráðir í háskólanám á Íslandi nægir að framvísa staðfestingu á skólavist við íslenskan háskóla ásamt gildum ferðaskilríkjum til að mega koma inn í landið.
Einstaklingar sem þurfa nauðsynlega að ferðast vegna starfa geta óskað eftir staðfestingu á undanþágu frá ferðatakmörkunum með því að senda póst á This email address is being protected from spambots. You need JavaScript enabled to view it..
Takmörkuð útgáfa vegabréfsáritana
Þar sem útgáfa vegabréfsáritana liggur niðri í mörgum löndum sem gefa út áritanir fyrir Íslands hönd gætu einstaklingar sem þurfa áritun til að ferðast til Íslands þurft að fresta för sinni þar til útgáfa áritana hefst á nýjan leik.
Einstaklingar sem þurfa áritun til að mega ferðast til Íslands geta haft samband við utanríkisráðuneytið sem veitir upplýsingar um útgáfu áritana, This email address is being protected from spambots. You need JavaScript enabled to view it..