Frá og með föstudeginum 24. apríl verður öllum sem koma til Íslands skylt að fara í sóttkví í 14 daga frá komudegi. Samhliða verður tekið upp tímabundið landamæraeftirlit á innri landamærum, samkvæmt því sem fram kemur í sameiginlegri tilkynningu heilbrigðisráðherra og dómsmálaráðherra. Að óbreyttu falla reglurnar úr gildi 15. júní 2020.
Um hverja gildir krafan um sóttkví?
Krafan um sóttkví á við um komu fólks, óháð þjóðerni, frá löndum sem sóttvarnalæknir skilgreinir sem há-áhættusvæði. Sem stendur á það við um öll lönd nema Færeyjar og Grænland. Reglulega verður endurmetið hvort einhver lönd eða svæði falli ekki lengur undir þessa skilgreiningu.
Leiðbeiningar um framkvæmd sóttkvíar
Hvers vegna þurfa allir að fara í sóttkví?
Á Íslandi hefur að mestu tekist að ráða niðurlögum COVID-19 faraldursins þannig að einungis nokkur tilfelli greinast daglega. Eitt mikilvægasta atriðið til að viðhalda stöðunni og koma í veg fyrir víðtækan faraldur hér á landi er að tryggja að smit berist ekki hingað frá öðrum löndum, hvorki með einstaklingum sem búsettir eru á Íslandi né ferðamönnum.
Hvernig verður reglunum framfylgt?
Tekið verður upp tímabundið landamæraeftirlit á innri landamærum Schengen-svæðisins í samræmi við útlendingalög og reglugerð um för yfir landamæri. Gerð verður krafa til þeirra sem flytja farþega til landsins að þeir útfylli svokallað e. Public Health Passenger Locator eða sambærilegt form og munu farþegar þurfa að framvísa því við landamæraeftirlit.
Með því er gert að skilyrði við komu fólks til landsins að fyrir liggi allar nauðsynlegar upplýsingar um hvar viðkomandi muni dvelja í sóttkví og hvernig henni verður háttað.
Hverjir mega koma til landsins?
Reglur um ferðatakmarkanir til Íslands eru einnig í gildi til 15. júní en samkvæmt þeim er útlendingum, sem hvorki eru EES- né EFTA-borgarar, óheimilt að koma til landsins nema þeir geti sýnt fram á að för þeirra sé vegna brýnna erinda. Sjá nánari upplýsingar í fyrri frétt á heimasíðu stofnunarinnar.