Eins og tilkynnt hefur verið á heimasíðu Háskóla Íslands verður samningur Útlendingastofnunar og HÍ um aldursgreiningar á tönnum ekki framlengdur. Núgildandi samningur gildir til 25. mars nk. og leitar Útlendingastofnun nú að samstarfsaðila til að framkvæma aldursgreiningu á tönnum í þeim tilvikum sem það er nauðsynlegt.
Útlendingastofnun vill árétta að verklag stofnunarinnar við ákvörðun á aldri, sem byggir á heildstæðu mati á aðstæðum einstaklings, frásögn hans, framlögðum gögnum og eftir atvikum aldursgreiningu á tönnum, er í fullu samræmi við ákvæði gildandi laga og reglugerðar um útlendinga.
Þá er rétt að ítreka að ákvörðun á aldri umsækjanda um alþjóðlega vernd felur ekki í sér afstöðu til þess hvort viðkomandi fái hér vernd eða ekki. Aldur er ekki grundvöllur alþjóðlegrar verndar einn og sér en hann er einn þeirra þátta sem litið er til við einstaklingsbundið heildarmat á þörf hvers og eins fyrir alþjóðlega vernd.
Að lokum vill Útlendingastofnun þakka Tannlæknadeild Háskóla Íslands gott samstarf.