Umsækjandi leggur fram umsókn
Umsækjandi kannar hvort hann uppfylli skilyrði um íslenskan ríkisborgararétt. Upplýsingar um grunnskilyrði má sjá hér.
Umsækjandi nálgast umsóknareyðublað og gátlista á heimasíðu Útlendingastofnunar eða í afgreiðslu stofnunarinnar.
Umsækjandi fyllir út umsóknareyðublað og aflar fylgigagna í samræmi við gátlista. Gagna gæti þurft að afla bæði erlendis (í flestum tilvikum vottorð) og hérlendis. Helstu aðilar hér á landi sem búa yfir gögnum sem umsækjandi þarf að leggja fram eru Þjóðskrá Íslands, sýslumannsembætti, Ríkisskattstjóri, skólastofnanir og sveitarfélög.
Ákveðin gögn þurfa að vera staðfest með ‚apostille vottun‘ eða tvöfaldri staðfestingu eftir því sem við á. Sjá nánar hér.
Athugið að ávallt er krafist þýðingar erlendra vottorða sem gefin eru út á öðru tungumáli en ensku eða Norðurlandamáli. Þýðing skal vera í staðfestu afriti eða frumriti og gerð af löggiltum skjalaþýðanda. Sjá nánar hér.
Umsækjandi greiðir fyrir umsókn og leggur hana fram hjá Útlendingastofnun eða póstleggur. Sjá upplýsingar um greiðslu umsóknar hér og opnunartíma og heimilisfang Útlendingastofnunar hér.
Umsókn tekin til vinnslu
Umsókn er ekki tekin til vinnslu fyrr en greitt hefur verið fyrir hana. Það athugist að meðalafgreiðslutími umsókna um íslenskan ríkisborgararétt er nú 12 mánuðir og umsóknir eru afgreiddar í þeirri röð sem þær berast. Á vef stofnunarinnar má sjá upplýsingar um hvaða umsóknir hafa verið teknar til vinnslu.
Það er á ábyrgð umsækjanda að skila inn fullnægjandi gögnum. Ef í ljós kemur við yfirferð gagna að þau eru ófullnægjandi er bréf sent til umsækjanda þar sem útskýrt er hvaða gögn vantar.
Útlendingastofnun aflar gagna til viðbótar þeim sem umsækjandi leggur fram. Við vinnslu óskar stofnunin eftir íslensku sakavottorði umsækjanda og umsögn lögreglu um hann. Upplýsingar um umsækjanda í þjóðskrá og staðgreiðsluskrá Ríkisskattstjóra eru kannaðar, auk frekari upplýsinga frá skattyfirvöldum ef þurfa þykir. Þá er upplýsinga aflað frá CreditInfo.
Veiting / synjun
Uppfylli umsækjandi öll skilyrði sem sett eru í lögum um íslenskan ríkisborgararétt er gefið út ríkisfangsbréf. Umsækjanda er sent ríkisfangsbréf í bréfpósti og honum tilkynnt að hann geti nálgast frumrit vottorða (annarra en sakavottorðs) hjá Útlendingastofnun.
Uppfylli umsækjandi ekki skilyrði fyrir veitingu er honum synjað um íslenskt ríkisfang og sent ákvörðunarbréf í ábyrgðarpósti.
Alþingi
Ef umsækjanda er synjað um íslenskan ríkisborgararétt getur hann óskað eftir því að umsókn hans verði lögð fyrir Alþingi. Sjá nánar hér.
Ákvörðun kærð
Fái umsækjandi synjun um íslenskt ríkisfang er honum bent á að ákvörðunin er kæranleg til dómsmálaráðuneytisins. Kæran skal borin fram innan 3 mánaða frá því að tilkynnt var um ákvörðunina. Dómsmálaráðuneytið tekur málið til umfjöllunar og staðfestir ákvörðunina eða snýr henni við.