Samkvæmt c-lið 2. mgr. 47. gr. reglugerðar nr. 53/2003 um útlendinga telst aðili vera sambúðarmaki, samkvæmt 2. mgr. 13. gr. laga nr. 96/2002 um útlendinga, hafi hann verið í skráðri sambúð eða sambúð sem staðfest er með öðrum hætti í að minnsta kosti tvö ár og hyggst búa áfram með aðstandanda sínum.

Sambúðarmaka íþróttamanns - B er heimilt að dvelja á landinu þegar sótt er um dvalarleyfi.

Hægt er að greiða fyrir fyrstu dvalarleyfisumsókn og senda hana í ábyrgðarpósti til Útlendinga­stofnunar, Skógarhlíð 6, 105 Reykjavík, ásamt greiðslukvittun. Ef umsækjandi er staddur á landinu skal hann koma til myndatöku um leið og umsókn er lögð inn hjá Útlendingastofnun eða til næsta sýslumannsembættis og hafa vegabréf sitt meðferðis.

Áætlaður afgreiðslutími umsókna er 90 dagar eftir að fullnægjandi gögn hafa borist. Ef gögn vantar eða eru ófullnægjandi lengist afgreiðslutíminn. Sjá nánar hér:

Dvalarleyfið er að jafnaði gefið út til eins árs í senn.

Dvalarleyfið getur verið grundvöllur búsetuleyfis.

Fyrsta umsókn - fylgigögn:

Ef umsækjandi er staddur á landinu er tekin mynd af honum þegar hann sækir um dvalarleyfið og ber honum að hafa vegabréf sitt meðferðis.

1. Umsókn um dvalarleyfi í frumriti, vel útfyllt og undirrituð af umsækjanda.
2. Ein passamynd (35mm-45mm).
3. Ljósrit úr vegabréfi. Gildistími vegabréfs skal vera minnst þrír mánuðir umfram gildistíma dvalarleyfis.
4. Sakavottorð, frumrit. Sakavottorð þarf að berast frá því ríki/ríkjum sem umsækjandi hefur verið búsettur síðastliðin fimm ár. Sakavottorð má ekki vera eldra en 6 mánaða þegar það er lagt inn hjá stofnuninni. Vakin er athygli á því að þeir sem hafa verið búsettir í Bandaríkjunum eða Kanada einhvern tímann á undanförnum 5 árum þurfa að skila inn sakavottorði með fingrafaraskráningu frá alríkislögreglu í Bandaríkjunum (FBI) og/eða Kanada (RCMP). Hér er að finna leiðbeiningar um umsóknarferlið hjá FBI: http://travel.state.gov/travel/tips/emergencies/emergencies_1201.html og RCMD: http://www.rcmp-grc.gc.ca/cr-cj/fing-empr2-eng.htm
5. Sjúkrakostnaðartrygging. Trygging að lágmarki 2.000.000 ISK skal lögð fram frá vátryggingafélagi með starfsleyfi á Íslandi. Sjúkrakostnaðartryggingin þarf að gilda í 6 mánuði.
6. Skráð sambúð. Staðfesting á a.m.k. tveggja ára skráðri sambúð eða tveggja ára sambúð staðfest með öðrum hætti, í frumriti.
7. Vottorð um hjúskaparstöðu. Þegar sótt er um dvalarleyfi á grundvelli sambúðar þurfa bæði umsækjandi og sambúðarmaki að leggja fram staðfest gögn frá þar til bærum yfirvöldum um hjúskaparstöðu þeirra.
8. Húsnæðisvottorð. Umsækjanda ber að sýna fram á að hann hafi tryggt húsnæði þann tíma sem dvalarleyfisumsókn hans tekur til. Vottorðið þarf að vera undirritað af skráðum húsnæðiseiganda og vottað af tveimur aðilum.
9. Framfærsla. Umsækjandi þarf að sýna fram á fullnægjandi framfærslu.
10. Umboð. Umsækjandi getur veitt aðila skriflegt umboð til að sjá um mál hans hjá Útlendingastofnun (ekki skilyrði).

Öllum erlendum vottorðum, sem eru á öðrum tungumálum en ensku eða Norðurlandamáli, þarf að fylgja frumrit þýðingar sem unnin er af löggiltum skjalaþýðanda.

Ef ástæða þykir áskilur Útlendingastofnun sér rétt til að óska eftir staðfestingu á gildi erlendra vottorða. Um er að ræða annað hvort „apostille” vottun frá heimaríki eða tvöfalda staðfestingu frá utanríkisráðuneyti í heimaríki og sendiráði viðkomandi ríkis hér á landi eða næsta sendiráði (hafi viðkomandi ríki ekki sendiráð hér á landi). Nánari upplýsingar um apostille vottun er að finna á: http://www.hcch.net/index_en.php?act=text.display&tid=37

Eftir að dvalarleyfi hefur verið veitt þarf útlendingur sem er áritunarskyldur að fá D-áritun í næsta sendiráði sem er í fyrirsvari fyrir Ísland og sér um útgáfu þeirra. Í dvalarleyfisumsókn skal tekið fram í hvaða sendiráð útlendingur hyggst sækja D-áritun ef leyfi verður veitt. Lista yfir sendiráð er hægt að nálgast hér.

Eftir komu til landsins þarf umsækjandi að:

• Skila inn læknisvottorði til Útlendingastofnunar (sjá nánar undanþágur og verklagsreglur á heimasíðu Landlæknisembættisins)
• Mæta í myndatöku og hafa vegabréf sitt meðferðis. Myndatakan er framkvæmd hjá Útlendingastofnun og öllum sýslumannsembættum á landinu

Að þessum skilyrðum uppfylltum er leyfið gefið út og dvalarleyfiskortið sent á heimilisfang viðkomandi. Upphaf dvalar miðast við útgáfudag leyfisins

Endurnýjun - fylgigögn:

Myndataka: Tekin er mynd af umsækjanda þegar hann sækir um endurnýjun dvalarleyfis og ber honum að hafa vegabréf sitt meðferðis.

Sækja þarf um framlengingu a.m.k. mánuði áður en fyrra leyfi fellur úr gildi. Að uppfylltum skilyrðum er dvalarleyfi að jafnaði endurnýjað í eitt ár í senn.

1. Umsókn um dvalarleyfi í frumriti, vel útfyllt og undirrituð af umsækjanda.
2. Ljósrit úr vegabréfi. Gildistími vegabréfs skal vera minnst þrír mánuðir umfram gildistíma dvalarleyfis.
3. Framfærsla. Umsækjandi þarf að sýna fram á fullnægjandi framfærslu.
4. Vottorð félagsþjónustu. Umsækjandi þarf að skila inn framfærsluvottorði frá viðeigandi félagsþjónustu þar sem fram kemur hvort hann hafi þegið framfærslustyrk eða ekki.
5. Húsnæðisvottorð. Umsækjanda ber að sýna fram á að hann hafi tryggt húsnæði þann tíma sem dvalarleyfisumsókn hans tekur til. Vottorðið þarf að vera undirritað af skráðum húsnæðiseiganda og vottað af tveimur aðilum.
6. Umboð. Umsækjandi getur veitt aðila skriflegt umboð til að sjá um mál hans hjá Útlendingastofnun (ekki skilyrði).