Forstjóri Útlendingastofnunar, borgarstjóri og ráðherra dómsmála undirrituðu í dag samning um þjónustu Reykjavíkurborgar við allt að 200 umsækjendur um vernd. Samningurinn felur í sér stækkun á samningi sömu aðila frá árinu 2015 sem kvað á um þjónustu borgarinnar við allt að 90 einstaklinga.

 

Að mati Útlendingastofnunar er samkomulagið mikilvægur liður í því að treysta stoðir móttökukerfis umsækjenda um vernd hér á landi. Stofnunin kappkostar að tryggja skjólstæðingum sínum fullnægjandi þjónustu að öllu leyti og hefur fyrri þjónustusamningur við Reykjavíkurborg reynst mjög vel.

 

 

Sigríður Á. Andersen, dómsmálaráðherra, undirritaði samninginn fyrir hönd ráðuneytisins, Dagur B. Eggertsson, borgarstjóri, fyrir hönd Reykjavíkurborgar og Kristín Völundardóttir, forstjóri, fyrir hönd Útlendingastofnunar.

 

Fyrsta mánuð ársins sóttu 67 einstaklingar af 19 þjóðernum um alþjóðlega vernd á Íslandi. Til samanburðar sótti 51 einstaklingur um vernd í janúar á síðasta ári. Það sem af er febrúarmánuði hafa um 40 einstaklingar sótt um vernd og er heildarfjöldi umsókna því kominn yfir 100 á fyrstu sex vikum ársins. 

 

Alþingi hefur heimild til að veita íslenskan ríkisborgararétt með lögum. Uppfylli umsækjandi ekki skilyrði sem sett eru fyrir veitingu íslensks ríkisborgararéttar í lögum nr. 100/1952 getur hann óskað eftir að umsókn hans verði lögð fyrir Alþingi. Umsóknir eru alla jafna lagðar fyrir Alþingi tvisvar á ári, á vormánuðum og í desembermánuði.

 

Frestur til að sækja um íslenskan ríkisborgararétt til Alþingis í vor er til og með 3. mars 2017.