Frestur til að sækja um dvalarleyfi fyrir námsmenn er 1. júlí 2016
Umsækjendur um dvalarleyfi fyrir námsmenn þurfa að virða tímafresti sem settir eru á framlagningu umsóknar á haust- eða vorönn, gæta að því að öll fylgigögn séu til staðar og að þau séu í réttu formi. Útlendingastofnun setur allar námsmannaumsóknir í forgang sem berast fyrir frestina og reynir af fremsta megni að afgreiða þær fyrir upphaf skólahalds. Ef umsókn berst of seint eða fylgigögn hennar eru ófullnægjandi, er ekki unnt að tryggja að námsmannaleyfi verði gefið út fyrir upphaf skólahaldsins.
Umsókn og öll fylgigögn verða að berast stofnuninni eigi síðar en 1. júlí ef veiting leyfis á að fara fram áður en skólahald hefst á haustönn.
Námsmannaleyfi fyrir almenna námsmenn eru veitt í 6 mánuði eða fyrir hverja önn fyrir sig, dvalarleyfi doktorsnema eru útgefin til eins árs í senn. Það er á ábyrgð umsækjanda að endurnýja leyfið að minnsta kosti 4 vikum áður en það rennur út.
Sækja þarf um dvalarleyfi áður en komið er til Íslands. Ef umsækjandi kemur til landsins sem ferðamaður áður en umsókn er samþykkt, stöðvast afgreiðsla hennar og dvalarleyfi er ekki gefið út. Það athugist að umsækjandi sem staddur er á Íslandi og vill fá dvalarleyfi verður að yfirgefa landið. Gæta þarf þess að lenda ekki í ólögmætri dvöl en ferðamaður má aldrei dvelja lengur á Íslandi en 90 daga. Áritunarskyldur einstaklingur má aldrei dvelja lengur en áritun segir til um. Sjá nánar um feril umsókna hér.