Vegna umræðunnar að undanförnu um þá þjónustu sem umsækjendum um alþjóðlega vernd hér á landi stendur til boða vill Útlendingastofnun koma eftirfarandi upplýsingum á framfæri.

Aðgengi að heilbrigðisþjónustu

Réttur umsækjenda um alþjóðlega vernd til heilbrigðisþjónustu, sbr. 26. gr. reglugerðar um útlendinga nr. 540/2017

• Umsækjendur um alþjóðlega vernd eiga rétt á nauðsynlegri heilbrigðisþjónustu og þeim lyfjum sem þeim eru nauðsynleg skv. læknisráði og að höfðu samráði við trúnaðarlækni Útlendingastofnunar. Útlendingastofnun stendur straum af slíkum kostnaði geti umsækjandi ekki staðið undir honum sjálfur.
• Umsækjendur um alþjóðlega vernd eiga jafnframt rétt á bráðaþjónustu og greiðist kostnaður vegna hennar af Útlendingastofnun.
  
  

Fyrirkomulag heilbrigðisþjónustu við umsækjendur um vernd skv. samningi Útlendingastofnunar við Heilsugæslu höfuðborgarsvæðisins

• Heilsugæsla höfuðborgarsvæðisins sinnir þjónustu við umsækjendur um vernd án tillits til búsetustaðar að undangenginni tilkynningu frá ÚTL um upphaf þjónustu.
• Umsækjandi sjálfur eða þjónustusveitarfélag hans getur pantað tíma hjá Heilsugæslu höfuðborgarsvæðisins þegar þörf er á læknisþjónustu.
• Í þjónustunni felst:
  • Viðtal og fyrsta heilbrigðisskoðun barna og fullorðinna stuttu eftir komu.
  • Almenn heilbrigðisþjónusta á dagvinnutíma eftir fyrstu heilbrigðisskoðun, þ.e.
    • viðtal við hjúkrunarfræðing símleiðis til að leysa úr einfaldari brýnum erindum, mögulega með aðstoð læknis,
    • viðtal við lækni samkvæmt ákvörðun hjúkrunarfræðings,
    • mæðra-, ung- og smábarnavernd og
    • útgáfa lyfseðla og endurnýjun þeirra.
  • Sálfræðiþjónusta.
  • Önnur sérfræðiþjónusta. Starfsfólk heilsugæslunnar metur þörf á aðkomu annarra sérfræðilækna og útbýr tilvísun sé þörf á því (hér undir falla t.d. bæklunarlæknar, skurðlæknar, geðlæknar og tannlæknar í undantekningartilvikum). Kostnaður vegna þessarar sérfræðiþjónustu er greiddur af Útlendingastofnun.
    
    

Réttur til að vinna

• Umsækjendur um alþjóðlega vernd mega vinna á meðan umsókn þeirra er til meðferðar ef þeir fá útgefið svokallað bráðabirgðadvalar- og atvinnuleyfi.
• Bráðabirgðadvalar- og atvinnuleyfi er veitt tímabundið þar til endanleg niðurstaða liggur fyrir í máli umsækjanda eða þar til synjun kemur til framkvæmda.
• Umsækjendur sem fá útgefið bráðabirgðadvalar- og atvinnuleyfi þurfa að verða sér úti um húsnæði og eiga ekki lengur rétt á framfærslu eða annarri þjónustu frá Útlendingastofnun.
  
  

Búsetuúrræði Útlendingastofnunar á Ásbrú

• Umsækjendur um alþjóðlega vernd sem geta ekki séð um eigin framfærslu á meðan mál þeirra eru til meðferðar stendur til boða húsnæði á vegum Útlendingastofnunar eða þeim sveitarfélögum sem stofnunin hefur gert þjónustusamninga við.
• Útlendingastofnun ákveður í hvaða búsetuúrræði eða hjá hvaða sveitarfélagi umsækjendur dvelja og er þá tekið mið af þörfum þeirra, stöðu máls og getu sveitarfélags til að veita þá þjónustu sem þeir þurfa.
• Öll búsetuúrræði Útlendingastofnunar eru opin og enginn þarf að dvelja í þeim gegn sínum vilja.
• Búsetuúrræði stofnunarinnar við Lindarbraut á Ásbrú var tekið í notkun um síðastliðin áramót og þar dvelja nú um 90 karlmenn í tveggja manna herbergjum.
• Útlendingastofnun úthlutar íbúum í úrræðinu strætókortum sem gilda í innanbæjarsamgöngur í Reykjanesbæ.
• Útlendingastofnun lætur íbúum jafnframt í té strætómiða til að sinna erindum varðandi umsókn sína á höfuðborgarsvæðinu, hvort sem er til að mæta í viðtöl hjá Útlendingastofnun, kærunefnd útlendingamála eða talsmönnum Rauða krossins, og til að nýta þjónustu sérfræðilækna og sálfræðinga.
  
  

Myndir úr búsetuúrræðinu á Ásbrú:

Skráning í íslenskupróf fyrir umsækjendur um íslenskan ríkisborgararétt hefst 11. mars á www.mimir.is.

Próf á vorönn verða sem hér segir:

• Akureyri, Símey: Mánudagur 27. maí 2019 kl. 13.00
• Ísafjörður, Fræðslumiðstöð Vestfjarða: Þriðjudagur 28. maí 2019 kl. 13.00
• Egilsstaðir, Austurbrú: Miðvikudagur 29. maí 2019 kl. 13.00
• Reykjavík, Mímir-símenntun: Vikan 3.-7. júní 2019 kl. 9.00 og kl. 13.00

Síðasti skráningardagur er 12. maí 2019.

Frá og með 1. mars nk. verður ekki tekið við umsókn um dvalarleyfi (fyrstu umsókn og endurnýjun), ríkisborgararétt, vegabréf fyrir útlendinga eða ferðaskírteini fyrir flóttamenn nema greitt sé fyrir umsóknina á staðnum eða að framlagðri greiðslukvittun. Þetta mun gilda jafnt í afgreiðslu Útlendingastofnunar og hjá sýslumönnum utan höfuðborgarsvæðisins

Umsókn sem berst stofnuninni með pósti verður að fylgja kvittun fyrir greiðslu afgreiðslugjalds annars verður hún endursend umsækjanda.

Vegna breytinga á framleiðslukerfi vegabréfa og dvalarleyfiskorta hjá Þjóðskrá Íslands verður ekki hægt að taka myndir fyrir dvalarleyfiskort hjá Útlendingastofnun þann 31. janúar. 

Í tilkynningu á vef Þjóðskrár kemur fram að þetta sé óhjákvæmilegt þar sem um sé að ræða tímafreka aðgerð við innleiðingu á nýju framleiðslukerfi, sjá nánar hér.

Beðist er velvirðingar á þeim óþægindum sem þetta kann að valda.